Sigrid Eikeland og Malena Nyland forklarar statsråd Liv Signe Navarsete kva Frampeik UB held på med då ho vitja standen til Frampeik UB. (Foto: Ungt Entreprenørskap)

Turen til Liilestrøm fekk Frampeik då dei vann samlinga for ungdomsbedrifter i Sogn og Fjordane på Nordfjordeid tidlegare år. Dei reiste saman med Fumé UB frå Måløy, som på Lillestrøm tok andreplassen i gastronomiklassen for sitt spesielle fiskeprodukt, røykte delikatesser frå havet.

- Når ein reiser på ei slik samling er det med håp og forventningar om å kanskje få med seg ein pris heim, så litt nedtur var det å ikkje få noko, fortel elevane. Men turen i seg sjølv hadde vore så interessant og hyggeleg at det nedturen verken var stor eller langvarig.

Som førstereisklasse såg dei at det var mykje å lære. Dei som vann kom frå ein skule som hadde vore med i mange år, og som nok visste kva som skulle til.

- Det er mykje erfaring å hente frå ei slik samling, fortel dei.

Frampeik UB stilte i konkurranse med 68 andre ungdomsbedrifter frå heile landet. Nivået var høgt og kreativiteten stor, og 2MK representerte Firda og fylket på ein framifrå måte.